منی موجیں دل ءِ درداں پدا آگاز کتگ مرچی
منی دمبرتگیں ڈیل ءَ پدا جمازکتگ مرچی
منا بانگوٛاہا کوکار ءَ چہ واب ءَ جہہ جنائینت
منا آ جنگل ءِ مُرگاں پدا آواز کتگ مرچی
منی دوست احتگ ات واب ءَ منا دلجمی داتگ ات
ہما واب گر ءُ داراں من ءَ ناساز کتگ مرچی
منا گشتے منی درداں پہ آسروان مگوازین ءِ
منا دوست ءِ ہدایاتاں پدا سرباز کتگ مرچی
برو آدمؔ مکش آہ ءَ گوں حقانیؔ بہ نند ساہ ءَ
ترا دوست ءِ وتی ڈاہ ءَ پدا ہمراز کتگ مرچی