پرشتگ انت مرچاں گوٛستگیں پُربیش
گرک گوں یک جاہ ءَ چریت پیر میش
پیش زورکان بیم کرت اچ گیش
نوں نہ انت کمزور بیرگ ءَ دل ریش
نوں پہ زوراکی کس نہ کیت کار ءَ
کس نہ ترسیت انت اچ سر ءُ سار ءَ
روت پیادگ نوں یکجا گوں سوار ءَ
منّت نہ کنت بزگر مرچاں وازدار ءَ
مزور بوت مال دار ءِ دل ءِ دانگ
کس نہ بیت بزگر کس نہ بیت شوانگ
کس نہ بیت کسی کٹ ءَ دلمانگ
نوں نہ انت مستر کستر ءِ پانگ
کاری اچ بے کار ءَ اگر بہر انت
مالک کاری اِنت بے کار بر اِنت
بے کار ءِ جاگہ نندگ ءَ شہر انت
کار پکنت بے کار پرچانوں قہر انت
بے کار وتی دستاں دور بدنت کار ءَ
کار پکنت بے کار بلیت پلگار ءَ
دستاں بگیجیت وت برد ءُ لنگار ءَ
نام بیت کاری بوارت وتی وار ءَ
کار پکنت کاری بے کار بہ بیت کاری
کار کننت بوار انت براس شرف داری
کس بگپت کٹّہ ونڈ ءُ سرداری
پہ پتاک براس بنت پہ امیت داری
نوں ڈگاراں کہ کچ پکنت سرکار
مُشتکے نام ءَ بہ کنت یک وار
کاری ءَ مالک جوڑ کننت وت کار
دربر وت لعنت پہ تپاک مردار
وشی پہ وت ماں وت کن انت محنت
دربر وت نفرت جوڑ بہ بیت محبت
نوں پہ زوراکی کس نہ گپت بہر ءَ
کس مہ بیت اشتر کس مکنت مہر ءَ
بے کار پہ کاری ءَ مہ بیت زہر ءَ
پہ تپاک بوشتنت کار کن انت تہر ءَ
آدمؔ دوستی ءِ دنت گوشیت پنت ءَ
حقانی دوستی ءِ کتاب ونت ءَ
ڈہ سلام کرت انت جھائو ؔنوں منت ءَ