نزاناں کہ چی ئے گون اَت گُل ءِ بچکندگاں مرچی

نزاناں کہ چی ئے گون اَت گُل ءِ بچکندگاں مرچی

پدا سہڑینتگیں دل کپت آس و اَنگراں مرچی

گوزے تو اَچ اِدا گُوات ءَ صباح ءِ گوں منا گُشتگ

اِے چار راہءِ سرا پہ خاطرءَ تئی نشتگاں مرچی

نزاناں کہ کجائے تو، گُل ءِ وشبو بہارانی

کہ شوہاز ءَ تئی امباز کنت دل کُنٹگاں مرچی

جتائیءَ تئی اَے ماہ رُو، نیں رنگ آؤرتگ

چہ انجام ءَ خبرداراں سر ءَ سر گوستگاں مرچی

پدا آزمینتگے دوشی منارا پُرّیں دیوانءَ

وفاءِ بار زُرتگ اِے نزوریں کوپگاں مرچی

اَے ساحرؔ درست اِدا بیگانگ اَنت یک آشنائے نیست

پہ بے ساری نزاناں چونیں جاہے آتکگاں مرچی