سرگوات بہ کشیت دن ءُ آتار بہ شنگ انت
زلفانی تئی نود شپے یار بہ شنگ انت
نز بیاینت غمءِ روچ تئی دامنءَ آسیں
بے کیفیں دلءِ تپتگیں پاہار بہ شنگ انت
بیگاہاں پریشان بہ بیت صحبءِ ندارگ
گوں شارءَ شپءِ کوچگ ءُ بازار بہ شنگ انت
سرگوات تئی مستی ءُ موجانی شوہازءَ
ملگور بہ شنگ انت ءُ برے شار بہ شنگ انت
مَا شعر گشیں قدحیں چمانی زبانءَ
داں کہ اے جہاں مانیت مئے کردار بہ شنگ انت
اے سر پہ سواب یے ءَ حداوندءِ درءَ کپت
نیکی اگاں سجدہ بیت گناہگار بہ شنگ انت
من عیدؔ بہ شوہازاں کجا ڈیہہ یے سماءِ
عہدانی زمین نند باں بے سار بہ شنگ انت