نہ روچ ءَ کناں طواف، نہ ماہ ءَ کناں سجدہ
من دروشم ءِ نُورانی ہر براہ ءَ کناں سجدہ
چے مومن ءُ ، چے کافر چے راز اَنت بہشتانی
من درد ءِ ثوابانی پیژگاہ ءَ کناں سجدہ
ہر تہر ءِ تہا مہر ءِ شوہازاں حُدا ءَ من
نیکی کہ منی دین اِنت، بدواہ ءَ کناں سجدہ
من شر ءُ بد ءِ ہر فرق دیستگ گوں وتی چماں
من عشق ءِ ہما کافر ہر راہ ءَ کناں سجدہ
بیا زیارتیں تئی دلبند معراج اِنت تماہانی
جیگ ءِ من ہوار موجیں درگاہ ءَ کناں سجدہ
ہو جُلگہ چو عرش ءَ اِنت دین مہر ءِ جبین ءِ مئے
ذگر واناں ہمُک بام ءَ، بیگاہ ءَ کناں سجدہ
ہر رنگ ءِ گنوکاں من ہر دروشم ءِ شیدائی
بّواں کہ بدنت مسکیں آ، سیاہ ءَ کناں سجدہ
راہ اوست ءِ گیابان ءِ ندریگ اِنت وفاہانی
ہر راہ ءَ سر پیت پُلّے آ، جاہ ءَ کناں سجدہ
دردانی گوانزگ ءَ عیؔد واب اِنت اے جہاں کُلّیں
ناوّل اِیت جوزگاں آ، من آہ ءَ کناں سجدہ