شھکور ھاراں گِپتگ اَنت
دِیدگ گُباراں گِپتگ اَنت
لَٹ اِش مُدام وارگ سر ءَ
آ کہ کَراراں گِپتگ اَنت
گِیمُرتگ اَنت اَجگیں نِھال
تبد ءُ لِواراں گِپتگ اَنت
کوھیگاں سنگر داشت انت
بند شہسواراں گِپتگ اَنت
مَرگ اِش کُتگ چم ءُ سراں
گِھمَرد مَیاراں گِپتگ اَنت
تئی جامگ ءِ دامُن تں جیگ
نکش ءُ نِگاراں گِپتگ اَنت
یا شپچِراگ اَنت کہ بَل اَنت
یا شپ سَھاراں گِپتگ اَنت
ساربان ساڑی پہ سپر
مَھری مَھاراں گِپتگ اَنت
سیلانی ئیں دل دائم ءَ
سیل ءُ نِداراں گِپتگ اَنت
آ سنگتاں بِل کپتگ اَنت
بسمل مَلاراں گِپتگ اَنت