زند ھما بکشوکیں سراں بُرتاں

زند ھما بکشوکیں سراں بُرتاں

مرگ منا شاھیں ھاترءَ داتاں

نِشتگاں من کوھانی تلمب چیرا

سیل کناں ڈول ءِ تھیر ءُ ماپاں

درچک و دار دُریں، گوں مُرتگیں ڈیلاں

سِستگیں شیپ، وکُولڈ ءُ پیشاں

مرد ھما انت که وپتگ انت کوھاں

نئیں کنت پروا شرتگ ءُ گرماں

پاگ وتی کھیوی ءِ سرا بنداں

نيئں وتی دوستیں مردمے گنداں

سرجناں کوھی تاپگ ءُ سِنگاں

ماجلاں آسیں نان پُرانیگیں

سِینگ ءُ وَنگانی بدل پِیماز

کُوپگے ریشاں کشگ ءَ دارے

آپ وراں لوردو تکواں پوریں

واب ءِ ماں کوھانی گِراں کوٹے

پند جناں دوریں مِیتگ ءُ ھَنداں

دوست بنت ھر کسءَ، جن وتی ماھیں

بَچ مُرادیگ، ءُ کاڈ زیبائیں

ھاجزیں مات ءُ پِت وتی پیریں

وارث ءُ سیاد ، مردم ءُ اَزیز

جل ھما ماتانی دل ءَ باتیں

دَست جناں بچانی وتی بَڈّا

گوندوی سوگند ءِ دیاں گرانیں

رُستگیں ٹاپاں ءَ گلے چاراں

سبزوگ ءُ نوک گرکیں بروتانا

رَپتگے شالا شانءَ ملاتے

بچ شهیدی ءِ جام ءَ نوشاتے

من تئی ماتءُ مادراں ھَکّیں

تو مزارانی پُشپدے گُرکیں

نِند تئی دَستان ءَ کناں هنی

تئی سرامن بنداں پاگءِ مَشهدی

چاکوءِ ھمبیلءِ تئی لانک ءَ

تُوپکے آس گواریں دَیاں دست ءَ

سَمبئیناں ترا کوش دیاں پَاد ءَ

من تئی  چماناں کناں سُرمگ

تئی کوپکاں دَزمال ءِ ھلی بَنداں

تئی سرا من بُگڈا ءُ گوبیت رِیچاں

په میتگ ءِ چُوری ءُ کسانیناں

تو بِزاں بچی بیتگے سَالونک

سُور کُتگ گوں راج ءِ واھگ و لوٹاں

بِیتگے سالونک په وَتن ننگیں

گوں آجوئی پکرءَ تو کُتگ آروس

کمبر ءِ نوک کن تو پدا نام ءَ

داد شاه ءِ کِسه ءَ کوانیں

کوه بِیباں دِلذوریں تئی واب جاه

سِنگ بیباں سرجاه ءُ تئی گندل بوپیں

نَنگ ءُ لَجانی تو بیبے دیمزور

وَپسگ پوپانی سرے وشیں

وَپت واب گوں ھاتونیں جن وجوداں

نِندگ و ٹوھیں گپ جَننگ مُپتیں

پاچک ءَ تومانی ورگ ھوشگیں

سئیل کنگ بیگاھاں کُل ءُ دمکانی

بیڈی ءُ سگریٹ ءُ چلیم ءِ کشگ

چرس ءُ باپور ھو ورگ بَننگے

سُوبت ءُ کستی ءُ جننگ چریت ءِ

نندگ ھُشکیں لیب ءُ پِیتّاری

ھوٹلاں نندگ ءُ ورگ چاۓ

مندر ءُ بیلءُ دروگ ءُ پیتاری

براه دینت لونڈُوءُ پناه گیراں

بےنپءُ بے سوبیں آلیماں کارے

نِشتگ ءُ آزات ءِ دُرائیں پکراں

مُلک منیگ انت، گپتک ات دست ءَ

بَستگے په وت شِشگ ءِ ماڈی

شَھر، کندیل ءُ دگوڈگ پرائیں

ما بلے چنڈے نانے ءِ مھتاج

چو چُورو ءَ گردیں پیروکی ڈیھهءَ

چو تولگ ءَ دوزیں ما وتی تیاب ءَ

آکری جنگیں، آکری وھدیں

آکری جنگیں تئی گار مابیت پجار

آکری جنگیں گوں دژمناں ڈهیه ءِ

َآکری جنگیں گوں ملک ءِ دپ چٹ ء

اپرین باتیں مئے اکبر ءَ پیریں

ھاجزیں کوھانی تها گردی

آو بلوچی ءِ وارتگے سوگند

گریتگ ءُ تیھار دنت پچار ماتاں

چار مری یانی سولوکیں بچاں

مینگل ءُ زھریاں مڈوکیناں

بارگیں لٓهڑی یاں مزار بیھمیں

لانگواں بولائی جنوکیناں

ڈومکی ، کُرد ءُ کوسواں مردیں

نودزی، ساسولی، لگاریاں

لنڈ ءُ تالپور ءُ پوژ ءُ گورگیجاں

رند ءُ لاشار ءُ ھاکمیں ھوتاں

لاسی ءُجت ءُ میریں سیاپاداں

بنڈ ءُ کھودائ، زگر ءُ جدگالاں

شور کُتگ یکجا ءُ زبان داتگ

په وتن میرانی سرا بکشیں

نوک کنیں تاریک ءَ بلوچانی

ما وتی بندیگیں سرا موکیں

ایرکنیں نام ءَ په پدی مرداں

نندگ و دارگ نوں دلءِ بسیں

بسیں نوں پریات ءُ منت و زاری

کس نه داں مُپت ءَ پنجوئ کاھے

بندگ ءَ دست ءُ پسکگ ءَ ھر روچ

اوشتگ ھو سر راهی سرے جاگ ءَ

مِنڈی مِنڈی ءَ چارگ ءَ پوج ءِ

زُت اگاں آجوئی کنیں ڈهیه ءَ

ذیر وتی دست ءَ توپگ ءَ درکپ

گریشگ ءَ تر و در بے کپ کوھاں

سر بےکپ جمپانی سرا ساھیں

اھد بے کن، سوگند ءِ بور نوکیں

تو ھسارانی بُرزیں واھند ءِ

میری ء کھنیں کلات تئی گیں

شاه جو ءُ مولائی تچوکیں آپ