آپ ءِ سرا چراگ بلان اَنت قیامت اِنت
آپ سمّاک ءَ جتگ، انسٹیٹیوٹ آف بلوچیا، 2019
شِنگ کن:
آپ ءِ سرا چراگ بلان اَنت قیامت اِنت
آس ءِ تہا گلاب رُدان اَنت قیامت اِنت
ہر نیمگ ءَ کہ شانک دیاں دیدگاں، زِر اِنت
تْرانگ منارا دور بران اَنت قیامت اِنت
بیا انشپی بگند ودار ءِ قیامت ءَ
ہمکوپگی ”منیرؔ“ ءُ ”کلانؔ“ اَنت قیامت اِنت
چہ سد رگ ءَ نہ جنت منی جان ءِ یک رگے
تہنائی اِنت زمین ءُ زمان اَنت قیامت اِنت
قاضیؔ تو پارسائی ءِ گپ ءَ کجا کنے
مہرانی گشتناں کہ نوان اَنت قیامت اِنت