اچ وتی واہگ ءَ کمار مکن
بے وفا ءِ تو اعتبار مکن
من وتی جان ءُ دل ترا داتگ
بے وفایے منا شمار مکن
اے دل ءِ درداں وت خبر دار ءِ
درد بے درد ءَ تو اوار مکن
آزمین سورگیں بیت رودینگ
کؤر دپاں سورگ ءِ کشار مکن
دل ترا داتگوں اگر لوٹ ئے
اے سرا ہم بہ بر معیار مکن
عاشقے روچ ءُ شپ ترا چار اِیت
یک نگاہ یے پکن ہزار مکن
اچ زہیران تئی پریشانوں
بیا منی کوچگ ءَ توار مکن
مرتگن یا مریں غماں بازیں
گیشتر ءَ مردگ ءَ شکار مکن
بیا ترا من وتی دل ءَ داراں
روچ پاساں نوں انتظار مکن
آدمؔ آ گل بدن ترا لوٹیت
تو پہ حقانیؔ دیم تہار مکن