اندوہاں گران باریں بجّینت نہ کت منءَ
تژناں جہانءِ گنجیں رنجینت نہ کت منءَ
نازاکیں زند ہم رنج ءِ وکشی اِنت گریشگاں
لوٹ ءُ تماہاں گوں وت گِرّینت نہ کت منءَ
پیسر کُتگ من سینگ بولان ءِ پراہگ ءَ
ٹہلانی نپت ءُ بِیراں شنگینت نہ کت منءَ
چونیں نِزوریں کردے بہت ءِ گلگ کنگ
دستءِ لکیراں ہچبر رُلّینت نہ کت منءَ
چے گوشت ترا کہ گران اِنت ارواہءِ سرسدگ
گِندئے توسست ءُ چہ وت گیشّینت نہ کت منءَ
کورانی شِنگراں من سر لکّ ءُ ریدگیں
درد ءُ غمانی ہاراں ملّینت نہ کت منءَ
ساہگ جہان ءِ سارتیں پہ من لوار بیت
تو ہم دمانے گوں وت جلّینت نہ کت منءَ