اَرسانی شُدیکیں ترٛمپ، چمّانی شہیدیں واب
سنگیں دلاں بورین اَنت، ملگور ءِ عذابیں تاب
اوشتات گوں تئی یاتاں ونتوں پہ گوٛمے نفلے
پُرسیگ مَسّیتانی مِینار ءُ ہمک مِحراب
اَرواہ ءِ پُتینکاں بیت درد ءُ غم ءُ ترٛمپے اَرس
ایش اَنت منی مڈّی، ہستی ءُ منی اَزباب
چُنت سِتر وتا پوش ئے زوراک ءُ تمردیں وہد
ہرکس وتی رنگ ءَ اِنت پچ بنت دِلانی باب
دل سُتگک ءُ بِریان اِنت، جند ءِ وتی اَرماناں
بستار نہ داریت ہچ دوزہ تئی آس ءِ زراب
سرگیپت گوں پادینک ءِ گوٛربامی زہیرونکاں
روچ ءَ پدا سوچیت ءُ ماہ ءَ پدا دنتیں تاب
دل اَنچیں کپوتے بات گوں نالگ ءُ پریاتاں
حوناں اوں بہ جوشینیت، اَرساں اوں بہ کنت کریاب
بنیادم ءِ اِیمان ءِ وہدے کہ پداں چارئے
بندہ گُشئے آگاہ انت اللّٰہ گُشئے کپتگ واب
ممتاز ءِ دل ءَ قحط ءُ ڈُکّال نہ جنتیں گوٛر
تنکہ چو بہار ءَ اَنت مہگونک ءِ ٹہل ءُ داب