راست کہ مکّاریں جنین دلدار نہ بیت
’زند ہما بدواہ اِنت کہ ہچ یار نہ بیت‘
دیدگءِ رُژن اِنت کہ دلءِ پاہار نہ بیت
سوب ہما ارسءِ ہون بیت استار نہ بیت
جی پہ تئی پکر ءُُ زانگءِ سرچمّگ زِریں
سَلّہیں آدینکءِ شُبین لیگار نہ بیت
داتگیں دراہیاں مہ زَر، دروگیں کِسّہ اَنت
داتگیں اَہدانی پدءَ دیدار نہ بیت
مارا مئے دوداں سانکل ءُُ زمزیلاں کتگ
جنگءِ پِڑ کبرستان بیت بازار نہ بیت
اے ہما راہ اِنت کہ نہ بیت کار پہ دیدگاں
اے ہما جاہ اِنت کہ دلوں درکار نہ بیت
ارش پیژگاہءَ چو سُہیل الماسی شِریت
تئی گمے انچیں گوں گماں سربار نہ بیت
تئی جتائی پہ آبلہ پادیں راہیاں
سیہہ شپے ہالو ہالوءَ بامسار نہ بیت