بیا بیا کہ من تئی رہسراں ذگریں دل ءِ حوناں مُشاں
پہ تئی دپ ءِ بچکندی ءَ ہر واہگ ءَ زند ءِ کُشاں
ندٛراں تو دیم ءَ مان مہ پوش دوشی بشارت بوت منا
ہجبر نہ بیتیں ماہکان تانکہ نہ شنگیت تئی گُشاں
باریں کدین ءَ دل منی رنجیت پہ نیٛاد ءِ پتّر ے
باریں کدین ءَ من تئی زئیرانی آس ءَ پیلُشاں
کولیگاں پہ من ساعتے اِستالیں چماں شانک دئے
بِلّے کہ مرچی سمبہیت مئے ترٛانگانی کلکشان
شالا مِراتاں کہ منی مرگ اِنت پہ من زندگی
وہدے منی قبر ءِ سرا تئی منگلی دست ءِ پرٛشاں
آسے کپا تیں درٛ یگتیں، گیدی ءِ بے مِہریں دل ءَ
گِنداں کہ کاڑانی گُلیں جالاری پوشاک تئی تُشاں