بے آپ وادکُشت بَلے من ہما وڑاں
وہد ءَ منا شمُشت بَلے من ہما وڑاں
انگت اوں گیر کاراں ہما مہلبیں شپاں
دل دلبر ءَ چے پرشت بَلے من ہما وڑاں
دل چے بزانت گندگ ءُ شَر ءِ تپاوت ءَ
من زُم زُم ءَ گوں شُشت بَلے من ہما وڑاں
بنی آدم ءَ اِے سَلّہ ئیں دنیا جَساں جتگ
ہر راہگوز لگُشت بَلے من ہما وڑاں
لُوہاریں آسیاب ءِ دو ٹہکانی درمیان
درد ءُ منارا درشت بَلے من ہما وڑاں
قاضی بدل نہ باں گوں اے امروز ءِ گردش ءَ
تو ہچ منا نہ گُشت بَلے من ہما وڑاں