بے گُمانی گوں منا مرچی حبر کُت آئی ءَ

بے گُمانی گوں منا مرچی حبر کُت آئی ءَ

واھگ ءِ حُشک ءُ کلنڈیں نُکّ تر کُت آئی ءَ

گُوَشت ئی پیداک اِنت رگامے شادھ ءِ بے گونَگیں

تْرونگل ءُ سارتیں سمِین پہ ما نَپَر کُت آئی ءَ

پہ کھیبے نیم چمّی چارگ ءُ بچکدگ ءَ

دل بھشت ءَ شادھانی بُرت ءُ سر کُت آئی ءَ

ماکہ رہ گپتیں گوں اُمّیتانی بوریں مرکباں

مِنزل ءِ کِشک ءَ را تچکیں ژیمب ءُ گَر کُت آئی ءَ

من گوں زِرد ءَ، زِرد گوں من اِھوت ءَ پُرسیت مدام

آ، کجام ڈوھ اَت کہ مارا دَر پہ دَر کُت آئی ءَ

تہہ کُشیں رنجانی گِردآپ ءِ تھا ایر بُک اِتاں

پہ منی رکّینگ ءَ حیلہ سَتَر کُت آئی ءَ

پیّکی گُوازینت ئی ساحرؔ مارا مرگ ءِ کنڈگ ءَ

بے وفائیں زند ءِ گَٹّیں کار شر کُت آئی ءَ