بیا ات بہاراں مورتا میشان پدا ساٹاراِتگ
کوہی شلنگ پادیں بُزان چو پاچن ءَ بوکاراِتگ
بستگ دو دیمی جمران گوات چشتا نوداں زری
مسکیں بہارانی سرا نوداں پہ واہگ گوارتا
کوہے چراگی شیلگان سرنگ نہ زنگ مئے وانڈ ہنت
ہور تاگ زانتگ نگوراں مے شوانگا گیواراِتگ!
ڈاچی گوں ہراں ترٛاپلیں مادگ گوں گوٛسکان چاپُلیں
میشان گوں ہورتاں تلملیں مئے بُزگلا زنگ مار اِتگ
زک ءِ نہ دارنت روگنان گہت انت بہ پیپ دبگان
شیر تچنت چوں چمگاں شیلانچ کوت ماسارتا
کاڈ گشادیں کیگدان آباد کتگ جود ءِ گدان
شومیں ءُ بدپیلیں جنان قسمت وتی ڈوباراِتگ
مال دار ءِ پُلیں پتر ءَ ستلّ رداَنت کِر ءُ گوٛر ءَ
آدمؔ نوں حقانیؔ گوٛر ءَ پیک وارتگ ءُ شاکاراِتگ