براق ءَ شہ دے تیزیں
یک ساڑتیں ساہے
یک دانہے، و آہے
بڑزا عرش روغیں
ماثے ءَ آہیں
کہ آنہی دیم ءَ
نوخ ورنائیں بچ
میریں حیاتے
ناحق تیرانی دیپان بیثہ
پھذی ساہ ماثئے
کُٹ ءَ شہ گڑدینت
پھذا موکلائنت
دُریں زبان ءَ شہ
ٹھوکے نہ کھذئی
چھنڑو چم ماث ءَ
جھذؤ داشتغ انتی
چماں شہ چُپیں حور
درکفغیث
اے بے بقائیں
دنیائی ءَ قصو
عربانی سُستی
بغائی ءَ قصو
دوستانی دروہ و
دغائی ءَ قصو
فلسطین ءَ کُلیں
تباہی ءَ قصو
ہمے ماث ءَ آہ و
انڑزی بہوخیں
دھرتی ءَ کھریں و
کھوریں خدایاں
بے باور و اے
لغوریں خدایاں
شہ لاچار بیثہ
و بیزار بیثہ
نی عرشئے خدایا
را گریے آں گُشانی
زوراخ و ظلماں
اے ٹوپی سرانی
مسلمان ءَ دروہاں
براں بیاں کھنانی
عرب عیش ءَ لاف ایں
دوراں کھنغیں
زندے سما نئیں
الئے چھوں گُذغیں
عرشئے خدا گِندغیں
وھث دے حالاں
فلسطین ءَ سیاہیں
شفے ماہ و سالاں
اے مکہیں ماث ءَ
انڑزی رِشوخیں
زمین ءَ پہ روشے
سیلاب ءَ کھار اَنت
ہم و ظلم و دروہے
زوراخی آنی
بے واکی آنی
دل ءِ سختی آنی
اے بتان ءَ دراہنت