چم گرٛیونت، اَرس بچکندنت
تئی غم ءِ ساہگ ءَ اَگاں وہدے
شاعرے زندگی بہ گوٛازینیت
شعر بنداں بہ کنت بہ نازینیت
دُژمن ءُ دوست ءُ رَپتگیں یاراں
نَے پہ باندات ءِ موسم ءَ فکرے
ناں دِلے وشیں درد پالائیت
نیکہ زِیکّ ءَ مں دامن ءَ بندیت
گرٛیت دیدوکاں کنت وتی آباد
پرٛوشیت اَرسانی شِیشگیں ترٛمپاں
چونیں زوراکے دُوری ءِ لذّت
لیڑہاں جوکینیت گوٛمے مَستیں
سِنگ ریزینیت کانی ءُ نمباں
کینگاں کوتاہ کنت دمانی ءَ
زہرگ ءَ چکپرٛوشیت بلوچی نئیں
دوزہ ءِ آس ءَ آس مانداریت
جنّت ءِ گوٛات ءَ دنت گْوات ءَ را
عاشقی چاڑ ءَ را کئے ءَ دیستگ
یا غم ءِ شررنگیں حیال ءَ را
فاضل ءِ قبر ءَ کنت زیارتے
چم گُشئے کونجانی رَمے گندنت
پہ وڑ ءُ رَہبندے رِد اَنت بال ءَ
بلکنہ کانیگے شُہاز ءَ اَنت
پہ منی وہد ءِ پرٛوشگ ءَ تُنّ ءِ
یا تئی عہد ءِ گرٛان وابی ءَ
بانزل اِش زانگ بنت گلگدار اَنت
چہ وتی بیل ءُ ہمدلیں یاراں
یا من ءُ توئے کارپداں گنداں
چو گُشئے اَرواہ ءِ سِدنت اوتاگ
او منی ہمزاتیں بنی آدم
شر دل ءَ پیڑا چِیلّک ءَ مہر ءِ
بند وتا عشق ءِ تَیل ءُ زمزیلاں
عاشقی پیرانی در ءِ دادے
آزمانی ءُ یا حُداوندی
بائد اِنت دُنیا ءِ ے بہ پہریزیت
من میاریگ ءُ تو میار بارئے
’تاں صلات ءِ ءُ محشر ءِ روچ ءَ‘