چَمّ اِش کہ دُرّ ءِ دانگ ءَ کپت اَنت
چہ وتی جِند ءِ زانگ ءَ کپت اَنت
اَچ سَبقّ ءَ کجام کُت اِش بنگیج
اِے کہ چہ علم ءِ وانگ ءَ کپت اَنت
گُوَر جَت اَنت مِھری شِیرکنیں نیاداں
دِیر چہ ”سِیر ءُ بچانگ“ ءَ کپت اَنت
آ کہ انگِرّ کُت اَنت اندوھاں
گُلگُل ءَ حون ءِ شانگ ءَ کپت اَنت
مَرگ ءُ زند ءَ چہ بیت اَنت بے پرواہ
کئے بزانت، کئی اِے ترانگ ءَ کپت اَنت
چہ وتیگاں کہ سِست اَنت آ، ساحرؔ
شِنگ چو تسبیح ءِ دانگ ءَ کپت اَنت