چاپ ءُ چوگانءَ کسے مست حیالانی تہا
انچیں شعرے مَا ترا بست حیالانی تہا
پیڑ اتگ دل گوں زہیراں تئی دوریءِ غماں
سرجمیں عمر پدا گوست حیالانی تہا
یک نگاہ یے تئی بے مہریءِ بے سوبیں دمان
نستگیں بحت دوبر نست حیالانی تہا
من گوں ارماناں تئی شررنگیءِ قصہ بکتیں
چنچو تاہیر منءَ رست حیالانی تہا
لبز ءُ معناءِ طلب شاعریءِ امبازءَ
صد برءَ سر مئے گشئے گرْست حیالانی تہا
عیدؔ شوہازاں عجب گونگیں رازے زندءَ
انچیں معنائے گُلیں ہست حیالانی تہا