چہ دل ءَ گیرے ءِ جتا کنگ ءَ
درد وشان نہ بنت دوا کنگ ءَ
یک برے محرمی توار بجن
سد برا من مِراں وفا کنگ ءَ
زندگی تئی بسات ءِ سوگند اِنت
مَرگ بارے نہ اِنت روا کنگ ءَ
ابروھیں شرتگاں کِمار نہ کنت
ناحدا گوں حدا حدا کنگ ءَ
وت وتارا غمانی شاہیم ءَ
من تیاراں پہ ”سیر ءُ پا“ کنگ ءَ
سنگ ءِ چکاسے ءَ بگْوازینے
کُٹ تلاھے نہ بیت تلاہ کنگ ءَ
شہر تئی بلکیں مصر ءِ بازار اِنت
اتکگاں من وتی بہا کنگ ءَ
گوں منا ” بُرز کوہ“ میم نہ بیت
عمر درکار اِنت تئی سما کنگ ءَ
قاضیؔ مُرواردے جلشک نہ دنت
چولاں دمبُرت رو ءُ آ کنگ ءَ