چے پیر ءُ فقیر ءُ پیغمبر دنیا وا حدائے چمان انت
انسانءَ جتگ انسانءِ قبر دنیا وا حدائے چمان انت
چو مَاہءِ جوانی تالان انت دریاءِ تہا ہر شپ پہ نصیب
کسءَ اوں ندیستگ روچءِ سر دنیاوا حدائے چمان انت
مَا کوشءِ نیت نازینتگ پلانی بدن اوں سازینتگ
چو صحبءِ سر ئے نودانی سفر دنیا وا حدائے چمان انت
مَا مندر مسجد واز کتگ مَا سنگءِ بت اوں امباز کتگ
چے آخرزمَان ءُ چے محشر دنیا وا حدائے چمان انت
پہ ہستءُ نیستءِ شوہازءَ ارواہ گوں زہیراں شورینتگ
چے بیتگ مئے عشقءِ آسر دنیا وا حدائے چمان انت
شیدائیں فقیرانی دیمءَ کعبہ ءُ چراغیں کوہءِ مراد
مئے ذگر ءُ نمازءِ گنجیں در دنیا وا حدائے چمان انت
تو چماں پچ کن چہ وابءَ د ل بیا کہ روئیں پہ توابءَ
باور کہ نہ کنت آبے باور دنیا وا حدائے چمان انت
اے رنج ءُ غمانی بازارءَ سینگاراں نگاہءِ دربارءَ
زیبا انت منی ماہءِ درور دنیا وا حدائے چمان انت
گوں ستک ءُ ایمان مَا زرتگ ذگرانہ وفاءِ سینگارتگ
ہو دل مئے مروچاں مومن شر دنیا وا حدائے چمان انت
ہر رنگ ءِ تہا تو زانگ بئے ہر رنگ ءَ ترا مَا عیدؔ گشیں
چو یار مکن ملائی ہنر دنیا وا حدائے چمان انت