تئی جیگ ءَ چہ کپت ہیرے زمین ءَ
گُشئے کہ رَست تاہیرے زمین ءَ
سرا تئی ہر سباہ ءَ پُلّ گوٛاریت
من کِشتگ اَنچیں انجیرے زمین ءَ
منارا پہ منی جند ءَ بہ کنت سر
بیار اِت انچیں پدگیرے زمین ءَ
منی طِفلیں دل ءِ قولاں بہ زُوریت
نہ گِنداں من چُشیں پیرے زمین ءَ
پدا بامَردیں فرہادے بیار اِت
بہ جَنت گُرز ءُ درئیت شیرے زمین ءَ
تو آزمان ءَ بہ نازین کہ بہ سہڑیت
من بنداں مُہریں کلِمیِرے زمین ءَ
تو شار ءِ ساہگ ءَ زندگ بہ دارئے
من بنداں پُلّ ءِ منگیرے زمین ءَ
او ممتاز من گوں پاہاراں گنوکی
بہ بکشاہاں دگہ گیرے زمین ءَ