چونیں مولمے ایرگواتءَ گوزیت زلفانی تئی
رنگءَ آسمان سنجءِ سمبہیت زلفانی تئی
شپ کہ چاڑ دنت زردءِ واہگاں پرکیفیں سمین
مسک ءُ مہلبیں اندام ءَ زریت زلفانی تئی
سُہبی موسمی نوداں شنز اتگ دریائیں دلءَ
بیگاہ لیٹ اتگ رولہ تلوسیت زلفانی تئی
سورءِ کلہءَ نازیناں ترا ہلکءِ دزگہار
ورنائیں سرءِ کسّہ نوک بیت زلفانی تئی
پہ من زندگی چو سیاہیں شپءَ ، تامور ءُ مُج اِنت
چمءِ ماہکان بازارءَ چمیت زلفانی تئی
عہدانی گُلیں اقرار واہگءِ درچکءَ بستگ اَنت
میریں چاکر انت وشبوہاں پلیت زلفانی تئی
ہوشامءِ زدگ کیفاں سمبریت ڈکالیں شپاں
رکانی سمین قدح انسریت زلفانی تئی
دیدگ کور بنت ورنائی اجب چکاسیت منءَ
سرمگ گونگیں دروشم کنجلیت زلفانی تئی
ماہءِ ماہکان عمرءَ دراج کنت دُعا بنت مستجا
عکس یے ترانگءِ پاہارءَ سچیت زلفانی تئی
پلانی بدن وہدے انسرنت روچءِ دامنءَ
تاموریت جہان سیاہی جمبریت زلفانی تئی
عیدؔ مئے تالہ انت دوریءِ زہیر بچکندءِ توار
موسم مٹ بنت لولاں انسریت زلفانی تئی