درد ءِ ابیتکی اِنت کہ دِلءَ دز جن ئے کُدیت
نوں اِیوکی ، پہ شِئر تَسلّہ دَیگ نہ بیت
مرچاں اے دَہر ءِ کاسَگ ءَ ہرچی ہَوادگ اِنت
بائِد نوں کْوہنیں موسمے وشّاں کَنگ بہ بیت
رُستہ کرار ءِ سبزُکیں نازینکے باتن ءَ
تئ گِلّہانی شَہم ےِ بِلگّیت ، تہا مِریت
ہر چمّ آگہ اِنت ، وتی وابانی گْوانزگ ءَ
باریں کجانگو چورہیں پریاتے اِنسِریت
روچ ءُ شپانی گُوازی ءَ ، ارواہ نہ موکِتہ
انسان اَنچیں لئیبوے ، لئیب ءِ تہا پُرشیت
سَبزیت تیاب ، ساوَڑ ءِ چؤلاں زہیر کنت
دنیا شِکستیں بوجی ے لُڑّان کنت گْوزیت
ہِیسکارگانی دَشت ، منی شَہرگ ءَ بُن اِنت
چو ہم نہ اِنت کہ جَنگل ءِ مُرگاں سما مہ بیت
مرچاں اے چمّ ، رِتکگیں ارساں وتی نکنت
مرچاں اے دل ہمیش اِنت وتی دْرِیکگاں گُڑیت
باندات ءِ سُہریں بِرانز مئے ہون ءِ امانت اِنت
کوٗریں زمین ءِ دیدگاں سَبزیں گَمے رُدیت
تئ یات لَڈّ ءُ بار بہ کنت ، میتگ ءِ دل ءَ
جیڑاں کہ ہورکیں دَمکے ءَ بِچکندے پَشکپیت
ارمان ، ما کہ موسم ءِ گاری شوہازِتہ
کسّے بئیت ، گوں منا گواتءِ پداں بہ گِیپت