گوں وَہماں بار بوتکگ اَت ، گوں وَسوساں روان اِتیں
ما گپ جت زمانگ ءِ ، ءُ ، جِند ءِ پُچّکان اِتیں
اے وہد ءِ مرکباں کدی ، پہ ہاجتے سپر نہ کت
ما پُرشتہ واب ، راہ گِسر ، ما اَنچیں کاروان اِتیں
شَپے گوں مِسکیں ترانگاں تئ دامن ءَ کہ جَلّتیں
پدا گوں ریزیں مہپراں سباہ ءَ پرّرِچان اتیں
اے کوریں دیدگاں نہ مَنت ، اُمیت ءِ رُژن ، آکِبت
تئ سُرمہ دان ءِ ساہِگ ءَ چو وابے ءَ پْرشان اتیں
مئے اہد ءِ بے مُرادیں گَم ، پہ باتِن ے مُرادی اَنت
گوں درداں سرگران اِتیں ، گوں ارساں دمبران اِتیں
پہ زند ءِ سوت ءُ ہالواں ، پہ مَرگءِ چیتک ءُ زارہاں
برے ما پُرس داشتگ ات ، برے ما کَورگان اِتیں
نہ زانتگَت ما راہ ءُ در ، نہ دیستگَت ما نیک ءُ بد
وتا گوں قَول بستگ اَت ، وتا گوں بد زبان اِتیں