دل ءَ بلین کہ دل ءَ روک بیت ہزار چراغ
نہ بیت روچ اے چکاّس ءِ شپ پہ چار چراغ
من مُرتگاں پہ تئی مہر ءِ ماہکان ءِ نود
میار پمنّی ادیرہ ءَ میار چراغ
ہدوک ءِ شہم، حیالانی گْرند، رژن ءِ روک
چراغ تاں کہ اے قہریں شپ اَنت تہار چراغ
بہ بیت پماّ انارکانی بام رک ءِ پُلّ
نہ بیت مارا ماں لنجیں شپاں پکار چراغ
بیاکہ پر تو زتگ ساہ کندن اوں عمرءِ
شپ انت حیات ءِ، نہ مان ایت تاں سحار چراغ
عطا ہما انت منی روژنائی ءِ زنداپ
ہماکہ راہسراں بیت، آ سگْوار چراغ