دل بِہ گندیت ءُ چم مہ گِنداں
ترا من اے ڈول ءَ کم مہ گِنداں
چم بگِنداتاں چمء وت غم
ءُ دل دمانے ءَ غم مہ گِنداں
دست بُرز اَنت ءُ مئے دُعا اِنت
مئے یار ءُ دوستان ءَ غم مہ گِنداں
تو گوٛستگ ئے کہ پہ بے اِنانی
من راہاں چوشیں قدم مہ گِنداں
تو دیدگانی دل ءِ تہائے
ترا چوں لوٹاں، ستم مہ گِنداں
تئی مہر ءِ اِیرہت بات اَنت دائم
بگِنداں ڈُکّال، ہتم مہ گِنداں
او زندگی تو چوں بے وفائے
من ساہ بہ کشّان ءُ دم مہ گِنداں
روچ مہ گِنداتاں شانتلان ءَ
شپ کپوتانی رم مہ گِنداں
ہما کہ برٛاہ اَنت کنجلانی
آ دیدگان ءَ ملم مہ گِنداں
ہما کہ ممتاز دلانی بہر اَنت
آ گپّ ءُ گالاں قلم مہ گِنداں