دِل گُلیں مَھرنگ ءِ جیگ ءِ دوچ ءُ پیتّاں دَر نہ کپت
ثمرھے ھم چہ کِشار ءَ مِھرءِ زِیتّاں دَر نہ کپت
نندمان ءِ آسمان ءَ چَمّ مُدام رھچار اِت اَنت
نوک طلاھیں وَشّیانی، دَھنز ءُ دھیتّاں دَر نہ کپت
پراہ پھناتیں جَھان ءِ بے حسابیں مَردماں
یکّے ھم جند ءِ وَتی تاوان ءُ سِیتّاں دَر نہ کپت
پچ بہ کنت قرن گُوَستگ ءُ زنگ بستگیں کُبلیں دِلاں
کُنجی یے چوشیں چہ تئی ”گنج“ ءِ کِلیتّاں دَر نہ کپت
واز کنوکیں میتگ ءِ مُلّا ءُ شھر ءِ قاضی ءِ
دل ھَوَسّوئیں چہ حَلوا ءُ گُبیتّاں دَر نہ کپت
کُشت ءُ کوش ءُ اِے پُل ءُ لُٹّ ءُ بَدی ءِ ولگُوَج ءَ
مَندراں گؤرے، خدا دوستے مَسیتّاں دَر نہ کپت
سر بہ کنت ڈیھ ءَ بھارگاھانی ساحرؔ منزل ءَ
واھِش ءَ ”ھنچیں سَرے“ ءِ پیربیتّاں در نہ کپت