دنیا دنیا دار نہ بیت من چے بگشاں
یار کہ گوں من یار نہ بیت من چے بگشاں
پشت ءَ چند ےتہلیں ترانگ پش گیجیت
وہد کسی پادار نہ بیت من چے بگشاں
مولم وش انت گوات سبک ءَ کشان انت
دئورءِ سر ءَ آچار نہ بیت من چے بگشاں
توبلئے چماں چہ گسر بئے دور روئے
غم تئی نشانی گار نہ بیت من چے بگشاں
واجہ حدا ھم بئیت اگاں مئے دنیاءَ
کار پہ بے کلدار نہ بیت من چے بگشاں
دو دءُ ربیدگ مٹ ءُ بدل بنت گوں وہد ءَ
مہرءِ میار آوار نہ بیت من چے بگشاں
قاضیؔ ھرچی کنت وتی قدءَ کر زیت
سار نہ بیت بے سار نہ بیت من چے بگشاں