دُرّیں بہ کش دانکے دپءَ مارا وتی حیرات بکن
نند گوں جنکانی سرپءَ مارا وتی حیرات بکن
گوں واہگاں ما ظاہریں تئی عہدءِ گل ما شاعریں
نّیت دلءِ مئیگ اِنت سپا مارا وتی حیرات بکن
درداں کلوہے گون بیت دل وا اِدا مئے حون بیت
چے گوشتگ اَت تو سرگوپءَ مارا وتی حیرات بکن
روچ ما کُتگ دستءِ دلءَ مسکیں پہ تئی گل میتگءَ
گوازینیں بیا رنج ءِ شپءَ مارا وتی حیرات بکن
ما عاشقیں رنگ ءِ تئی ما گوں فقیراں کپتگیں
دُنیاءِ بِل سیت ءُ نپءَ مارا وتی حیرات بکن
دل کہ حیال ءِ درگہ ءَ کپتگ تئی مہر ءِ سجدہءَ
قاصد بگُش گوں دُرّ دپّءَ مارا وتی حیرات بکن
عیؔد سال ءَ دیم ءِ یا نصیب باریں کہ بیت یا کہ نہ بیت
اے زندگی ءَ نیست وفا مارا وتی حیرات بکن