اے ہوشام ءِ منزل کجام انت

ما، بزانتیں کہ باندات ءِ آسر چے انت،

مرچی ئیں روچ مئے زند ءِ آسر نہ بوت

وائے ناز انتیانی گناہ!

کہ واہگ ملام انت

راستے کہ حدا اچ دل ءِ گْواہی ءَ بیت، پہ دیدگانی تہ ءَ

ہچ حدائی نہ مانیت

لقا کہ غلام انت

دل کہ ماریت، تہ آسر، کسے وانک ءُ بے وانک

زندانی ہمراہ

ہوشامیں ارواہے ءِ پلّو ءَ

واہگانی تلام انت

مئے حیالانی جلگہ کہ دائم وتی جوڑ کرتیں بُت ءِ سجدہ جاہ انت

چوں بے حدا انت !!

اچ ’’نہ بوت‘‘ ءَ پہ ’’بوت‘‘ ءِ رُدوم

’’نیستی‘‘ ءَ ’’ھستی‘‘ ءِ توم

پہ مدام انت

زی ئیں ارمان ءُ بانداتیں امیت

قرن قرنانی زند ءِ متاہ

’’مرچی‘‘ ءِ کندہ ءَ

سرجنان انت، اچ زانگ ءِ کس نہ دیستیں وس ءِ

ہار ملّیت کہ کندہ پْرشیت

اے ہوشام ءِ منزل کجام انت!!