گلاب رَنگ تئی دیوانگی مُلور نہ کنت
مُلوریں مردم ءَ دِلمانگی مُلور نہ کنت
اے دَرد سَگیتہ انچو کہ پہر بَست کناں
مناں نوں یار منی ایوکی مُلور نہ کنت
ما زانیں مُرتگیں مَردم کَدی مُلور نباں
پمشکہ مارا کَسی وتکشی مُلور نہ کنت
زمین ءِ اَست گلام اِنت ترا ابید من ءَ
منارا تھنا منی عاشقی مُلور نہ کنت
ما زانیں عشق ءِ پِڑ ءَ چست ءُ ایر المی اِنت
پمشکہ مارا اے پوریاگری مُلور نہ کنت
تئی روشت سر ءُ چم بَلے رواج اِش اِنت
ابیتکیں مردم ءَ مردم کَدی مُلور نہ کنت
منیر، شِہمیں مبارک، اتا، سید جاناں
ہزار رَنج بَلے اے صدی مُلور نہ کنت