تئی گِلگ جاناں سَر ءُ چم بَلے جُست بِگر
من تئی ویرانیں نگاھاں چیا چاریت نکناں
پرچا بالاد ءِ ابیتکی تئی منا میم نئیت
پرچا تئی شیرکنیں آواز منا موم نکنت
دل چیا پہ تئی لب ءُ گردن ءَ بیمار نہ اِنت
جان پہ من تئی تلب چو گُشے تُن ءَ زیبا
ءُ تئی لوٹ پہ من ساھ ءِ ھساب ءَ الم
چی کناں دل پہ اے ویرانیں زمین رَھن کُتہ
میم پہ بُن گپتگیں بازاراں وتی بَکشاتگ
بیا منی میتگ ءَ یک چمے بچار چی ھَست اِنت
چارراھانی سرا ایراں گُشان، اکس ءُ مراد
اے گُشانانی سرے رَنگ لگوشتہ روچ ءَ
اکس یک پیماں بَلے چُک مزن بیاناں
کَرن مَٹ اَنت اے مراداں بَلے کس جُست نکنت
گِس بُن اَنت تیوگیں بازار ءَ نگواہیت کَسے
بچ درانڈھ ءَ نزاناں کہ کدی واتر باں
لھتے اکساں کہ پہ نیمون دگاں میلانک اَنت
لھتے ماتاں کہ پہ بچانانی امیت ءَ نہ مِراں
تو گِلگدارے بَلے جان گِلگدار مہ بیت
من ھوں زاناں پہ زمین من دگہ زھم ءِ نجناں
داں بَلے اَستاں وتا جَنگ زَدیں بچ ءِ لیکھاں
پَرس داراں پہ زمین مُرتگیں براتاں جاناں
من چہ زیبائیں نگاھاں تئی پھلی لوٹاں
داں تئی بالاد ءَ منا ھاک ءِ گُلیں وشبو نئیت
داں تئی آواز پہ آجوئی دَگاں چِست نہ بیت
تو منا تھنا پہ زیبائی گڑا دوست نبئے