Narcissist

گلامی ءِ زَد ءَ تلاھیں ھاک ءَ جاھمندیں یک ملامتیں مُریدے ءِ تب ءِ تلب تئی زیبناکی اِنت بَلے

پہ تو وَ المی نہ اِنت

کہ تئی نیاد ءِ سادگیں سبارگے

یا شامے تئی تلاھیں ساھتانی مئے وڑیں لگورے ءَ اوں سَر بہ بیت

پہ تو وَ اے اوں زیبناکیں گلزمین ءِ رنگ ھژدری نہ اِنت

کہ تو بہ جیڑھے پہ من ءَ

من سِلگتیں ھیال ءُ لیکہ آنی وت شناس ءُ زال دوستیں یک بلوچے آں

من ءَ گوں جیڑہ آں چِہ کار

نہ جَند ءَ کرد ھست ءُ نئیکہ کردگاریں مردمانی دراج بیتگیں لڑ ءَ گوں ایمن آں

کس ءَ گوں بھ یکیم ھم نہ باں ءُ نئیکہ بیت کناں

پہ من مدامی ھچ چیز انگتہ نہ اِنت

نہ من گوں راجدوستی ءَ وتی وتا پہ شان گوں تسلہ ءِ یکیم کُت کناں

ءُ نئیکہ گوں وتی تب ءَ پہ سیاسی جیڑہ یے ءَ دانکہ زندگاں مُلور باں

نہ من گوں سِتکے ءَ وتی تہ ءِ نہ گیگیں مَردکار ءِ شِنگ ءُ شانگیں زانگ ءَ تُشے اوں دیر شُت کناں

پہ من تئی تلب اوں ابرمی ھزانگے نہ اِنت

تئی اشک ءَ بے کراریں مَرد چُشیں دیوانگے نہ اِنت

کہ سَر بہ دنت پہ تئی جبین ءِ مِکیں کوہ دروشمیں ملوریں مَنتکاں

یا پہ تئی شراب دابیں دیدگاں وتی تہ ءِ تمامیں واھگاں ھتم بکنت

پہ گلزمین شھید بہ بیت

بہ جیڑ ایت پہ اے گُنگ بیتگیں زمانگ ءَ کہ انگتہ وتی نہ اِنت

نہ پہ وتا تُشے گمیگ بیت کنت ءُ نئیکہ پہ دگہ کَسے

ھزار درد سَگگ ءَ چہ پد اوں نندگی نہ اِنت

تو وت بُگش

کجام سِتک تیر سُرپتگیں سوالاں پد اوں ایمنی زبان زانتیں زانتکار ءِ تہ ءَ رُدوم گِپت کنت

کجام لیکہ اِنت کہ ھون ءُ جون ءِ تُورگ ءَ چہ رند اوں پہ سِتک دل مریداں دوست بیت

کجام پلسپہ گوں کوھن بیتگیں دلیلاں ھست ءِ جیڑہ آں گوں جَنگ دات کنت

کجام موسم اِنت کہ تاکچنڈیں اے دل ءَ بلوٹیت رنگ دات کنت

گلامی ءِ زَد ءِ تلاھیں ھاک ءَ نِشتگیں زمین رنگ بُگش

منی تہ ءِ تبی گنوک ءَ تئی تلب چتور چہ اے وت شناسی ءَ چہ دیر داشت کنت

یا گلزمین ءِ گم منی وڑیں لگورے ءَ کجا تمردی ءِ سکین دات کنت

من پلسپہ جَتیں گنوک

ءُ زندگی ءِ دستاں پروش وارتگیں ھوا ءِ بَچ

نہ گوست ءِ دروگیں کسّہ آں گوں زانتکاری ءِ ھرابیں وئیل ءَ ساکم آں

نہ ھَست ءِ مالداریں زَر پرستی ءِ ربیدگ ءَ گوں ایمن آں

وت چہ سِتک دل یکیم اوں نہ آں

منی تہ ءِ تمردی ءِ سبب مناں تو وت بُگش

اے کردگاریں زندگی ءِ کاروباریں دروشم ءِ تہ ءَ چی اِنت کہ سِتک دل کسَے گوں آئی ءَ ھوار بیت کنت

کجام سِتک ءُ ھون ءُ اِشک ءِ جیڑہ ءِ تہ ءَ چٹ ءَ پہ ایمنی داں ھست اِنت گار بیت کنت

او زیبناکیں گلزمین ءِ رنگ پہ تو اے ھژدری نہ اِنت بَلے

اگاں تئی نیاد ءِ سادگیں سبارگے

یا شامے تئی تلاھیں ساھتانی مارا سَر بہ بیت

اے زندگی چہ لھتے جیڑھاں چٹ ءَ یکیم بیت

من بیت کنت اے اھد ءِ گُڈی وت شناسیں شائر آں

ءُ بیت کنت کہ من گوں وت شناسی ءَ وتی تُشے اوں گَل نہ اں

بَلے تلاھیں ھاک ءِ نِشتگیں مُریدے ءِ تب ءِ تلب

من اچ وتا تُشے اوں انگتہ پشل نہ آں

آزر مراد