Guilt
منی دنیا
تئی زلپانی نیام ءَ زاھریں گیوارے کِشک ءَ گِر
داں تئی بالاد ءِ دمکاں بیا
ھمنچوک گام بیت تھنا
بَلے زیبائی ءِ کَچ ءُ کساس ءَ وھدے کَسے گواز کنت تہ زانت
کہ اے گامانی میان ءَ گیدی ءِ ھست ساھ زیران اِنت
جھان اَنت سبز ءُ آباد اَنت
زِر اَنت کہ ساھ داروکیں ھزاراں لیلوکانی نیلیں آپدان اَنت
ھزاراں آزمان کَل اِنت ھمے دمکانی میان ءِ شیر چکیں کِشک ءَ
نزاناں چنکس استالانی کوھنیں کُنٹ اے گامانی میانے ھورکیں جاھاں ساھ زیران اِنت
نزاناں باریں چنکس ماھ آباد اِنت ھمے ھَلک ءَ
اے کشک ءَ موسمانی سبز ءُ زَردیں نیت ءِ ھرچ رنگ زاھر بنت
بَرے پاتو چہ اے کشک ءَ پہ پُلاں تام شوھاز اَنت
بَرے بالو پہ رژن ءِ کالکے کائینت
بَرے مُورانی ٹولی چہ ھمے بالادے میانی دمک ءَ شیرگ پنڈگ ءَ کئیت اِنت
بَرے مُرگانی لَڈوکیں رَمے گوں زیمر ءُ سازاں ھمے بازار ءَ بُنجل کَنت
بَرے رنگانی دنیائے ودی بیت برھنگیں دمکاں
بَرے تام ءُ تماھانی یک ھارے آپ کنت اشکندیں واھشتانی بُرز ءُ مھکمیں بنداں
بَرے من زندگی ءِ سرجمیں لوٹانی امبار ءَ ھمے کِشک ءَ پہ وت گنداں
بَلے مرچاں
منی دنیا ءُ اے گامانی میان ءَ ھورکیں بازارے
کلنڈ ءُ ھالی ئیں کِشکے
گِسانی پُرشتگیں دراجیں کتارے
مُرتگیں درچک اَنت
ابیتک ءُ ایوکیں مُرگاں
مُلوریں موسمانی یک رَمے
استین رنگیں لھتے سیاھیں جمبراں ءُ برھنگ ءُ بڈولیں آزمان اِنت
تھار ءُ مرتگیں استالی کُنٹ اَنت
مُلور ءُ ٹپی ئیں ماھے
ابیتکیں بَلوکے
اکسے
بلاھیں مُچی یے
ءُ تیر بندیں موٹلانی دراج ءُ بیمناکیں کتارے
تپنگی مردماں
ءُ تُرسناکیں بے تواری یے
من اے گامانی میانے شیر چکیں کشک ءَ
چہ دراھیں مردماں گِستا
ھمے ھاموشی ءِ میان ءَ تئی دلبنداں چاران آں
ءُ جیڑان آں
اگاں اے ھورکیں بازار ءُ ابیتکیں گلزمین ءِ گم تئی بالاد ءِ باھوٹ اَنت
گڑا من اچ تو چی لوٹ آں
پہ من اے جلواناک ءُ ایوکیں کِشک ءَ گڑا چی ھست
من اے گامانی میان ءَ گوں کجام واھشتاں اوشتوک آں
کجام اُزر اِنت منی کہ اچ تئی لوٹ ءَ بہ بیت آسر
کجام درد اِنت کہ تئی دیدارے درمانانی مھتاج اِنت
چیا پہ من تئی اجگیں تلب
تئی برھنگیں واھگ
مُلور ءُ بسملیں واھشتی ءِ بے پَردگیں کوکار
منی زانت ءُ مرادانی ھڑکہ بستگیں وابزار
چہ مزنیں جیڑھاں گیش اَنت
منی دنیا
مناں تئی جیگے باھوٹیں شرپ ءِ نرم ءُ نازورکیں اے بُرزی پہ تلب دوست اِنت
من گیشتر اچ تئی جہد ءَ تئی زیبائی ءِ پہریزگاریں پیروکاری آں
من اسل ءَ سک میاری آں