ھون پالاتگیں دلانی تہ ءَ
چنچو گم چیر اِنت کندگانی تہ ءَ
یات تئی دائم ءَ دل ءَ نکش اِنت
تو نمیران ئے تْرانگانی تہ ءَ
اے کجام بادشاہؔ ءِ دربار اِنت
ریک مان سُھر ءِ کاسگانی تہ ءَ
مرچاں انسان ءِ نام گْواہ نہ کنت
دربگیج مھرمے سگانی تہ ءَ
گُل گوں بانوری سھت ءُ سینگاراں
چاردھی ماھے مھکجانی تہ ءَ
تو ھربوئیؔ ءِ انار ءَ ئے
تئی دگے نامے نیبگانی تہ ءَ
بندگی کنت دل ءِ کبرستان ءَ
زندگے ھست مُردگانی تہ ءَ
قاضیؔ تو سنگ ءِ تْراشتگیں بُتے ئے
ھون مان نیست تئی رگانی تہ ءَ