ھیال ءِ باتن ءَ آسر جھان زانگ بیت
زُبان ءِ گُنگی ءَ پیسر زُبان زانگ بیت
مچار اے بزگ ءُ لاچار واریں ھمشاماں
شُدیگیں لاپ ءِ گنوکی ءَ نان زانگ بیت
نگاھاں یکبرے پمں بہ شانک تو زان ۓ
چی مھرے پہ وتن ءَ دیدگان زانگ بیت
بہ ساز سد چشیں پندل بکن ھزاراں مکر
تئی دست ءَ اِیریں ھُدا ءِ قُران زانگ بیت
نداراں سُدّ ءُ سمایے زمانگ ءِ ترس ءَ
من بے اِنان بہ باں بے اِنان زانگ بیت
کروجاں من وتی زانشت ءِ زانت ءُ پجار ءَ
منی کہ رستگیں وھدے نشان زانگ بیت
پہ ڈیہہءِ آجوئیءَ سربُلند کُربان انت
زمینءِ پسگاں بولان ءِ شان زانگ بیت
وتارا لیکہ مزن کپتگ ئے تو دَرمُلک ءَ
اگاں بداتیں وتی ساہ ءُ جان زانگ بیت
مئے براس ھست انت ماں کوہ ءَ زمین ءَ پھریزانت
پہ ڈیہہ ءَ شیدا اَنت پیر ءُ جوان زانگ بیت
ھمے تو داب ءَ وتی جزبگ ءَ بدار گپار
درا گوں تیر ءُ تپنگاں توان زانگ بیت