زُرتگ من ءَ ڈیہے گماں
جیڈاں من روچی سد بر ءَ
سر بلکین ءَ روچی کپیت
زرتگ زھیراں شر من ءَ
میتاپ ءُ ڈن ءُ کُوچگ ئے
پہ کئوشے نرمیں کشگ ئے
یات بنت ھر پاس ءُ دمان
کای اَنت پد ءَ نوبت کدی
گوں جیڈگ ءَ سد بر مراں
ماتیں وتن پہ مراں
تیراں من دل بندا وراں
گوں جیڈگ ءَ یات ءَ گپاں
ماتی وتی رُکست من کُت
دست ھم منی بڈا جتے
گوں کندگ ءَ گوشتے من ءَ
ارساں وتیگاں چیر مدئے
من گندگے جت ھم دل ءَ
پرچ ءَ ملورئے تو دل ءَ
داتے منارا پسوئے
بچی منی بچی منی
شرتر نھئے تو چہ اشاں
ھک ءَ وتی سرجم بکن
ماتے دوا گون انت ترا
ھچی نہ بیت شالا ترا
گوں کندگ ءَ رُکست من کُت
سھتے نہ گوست واب ءَ من ءَ
واب ءَ چہ بدرھتاں بلے
بژنیگ بیتاں من دل ءَ
برچا من وابے دیستگ ات
گپار وتی دستے رس ءَ
گوں گیرت ءُ ننگ ءَ وتی
ھک ءَ ادا کن تو وتی
من پہ وتن کُربان باں
من پہ وتن کُربان باں