ھُدا ءِ اُمّیت ءَ نِشتگیں ما
بِچار کہ چِینچو بے وسیں ما
کَسانیں گپّاں دِل ءَ کنیں ما
چَہ یکّے دومِیگ ءَ کستریں ما
ما دیم تَرّینتگ جُزّگا ایں
پہ مِنزل ءَ چونی ءَ رَسیں ما
مئے زِیکءُ مرچِیگاں شانک چَمّے
کجا دراَتکیں، کجا سَریں ما؟
چَہ راہ ءَ گار اَنت، بے سَریں سر
پمیشکا ورّود ءُ وَسّریں ما
مئے دِلسَپائی گنوکی اِنت مئے
نَہ داریں راز ءَ دل ءَ دئیں ما
پہ دوستی ءُ دشمنی ءَ دائم
چہ ساہ ءُ اَرواہ ءَ سر گْوزیں ما
تِپاکی لوٹ اِیت پہ آجوئی ءَ
ما شِنگ ءُ شانگیں سَراں سَریں ما
زَمانگ ءِ چمّ مارا سَکّ اَنت
نِدارگی ایں، نِزاھیں ما