اِشاں ترانگ تئی نوداں کہ دات اَنت
مِچاچانی سَرا اَرس اِش کمات اَنت
صباح اِش کرتگ اَنت شپ قندھاریں
پہ بے وابی کہ چمّ اِس سُھر ءُ گوات اَنت
پہ مِھرے پُرّیں تاسے شربت اِش دات
منارا اِنسرینت اِش اِنسرات اَنت
منی ھجگیں دل ءَ درد اِش کہ تُرومبینت
جبین ءَ اِشکریں رنج اِش رُدات اَنت
شتور، راہ ءَ گران اَنت کیچ ءِ مَھری
سوار اِش پُشت ءَ کمّیں چَکّ جَنات اَنت
اے شِلّیں کُنٹگ ءُ بُرز کَنڈگیں کوہ
گوں روچ ءَ ایر روانیں، ایر رَوات اَنت
گُشان اِنت ساحرؔ سَسّی کیچ ءِ ھوتاں
منی چیھال شمے گوشاں کپات اَنت