عشق ءِ حدیث ءِ بئیتے الحان کُتگ زہیراں
ذِگرانہءَ دلءِ مئے چوگان کُتگ زہیراں
حافظ قرآن ئےءِ چو سوزءَ تلاوتانی
آیاتے مہر ءِ پاکیں وانان کُتگ زہیراں
رِحلءِ سرا دلءِ مئے ، دُرّیں کتابءِ پئیمءَ
لال ءِ بہشتیں اندام تالان کُتگ زہیراں
دیدار لالءِ چوکہ شیریں دوکُرمءِ زیارت
دیم پہ گُلءِ زمینءَ جُنزان کُتگ زہیراں
کاڈانی ماہیں بالاد بانور بنت پہ سئیلے
پاکیں النگءِ ایرگْوات ساچان کُتگ زہیراں
دوشیگیں وابءِ معنا بچکندگےءَ داتگ
تئی ترانگاناں دین ءُ ایمان کُتگ زہیراں
مہرءِ مُرادءِ کوہیں دل بیا ابیتکیں بے تو
بَرّءِ کہیرءِ چیرءَ دیوان کُتگ زہیراں
گوربامءِ ذِگر ءَ ہرشپ ونتگ تئی نامءِ تسبیح
پہ من حُداءِ شوہاز ارزان کُتگ زہیراں
زندءِ غمانی دروشم رنگ ، رنگ ہزار فرقہ
ہرگپ دلءِ گوں عؔیدءَ درشان کُتگ زہیراں