عشق وفاءِ چماں چاریت چے گندیت
تہنا مہرءِ درداں مَاریت چے گندیت
ہلوت کنت گوں صحبءِ نودیں وشبوہاں
بانک نشتگ زلف سماریت چے گندیت
وہدءِ چماں جتک جن انت رند ءُ لاشار
پیریں بلک قصہ کاریت چے گندیت
ورنائیءِ بامءَ داتگ عمرے بیت
انگت کسے دست شہاریت چے گندیت
مَاہءِ مہکان زندءِ زمینءَ ڈوباریت
رژن تہاریءَ شہکاریت چے گندیت
آ چو حداءِ پاکیں نامءِ بستارءَ
مارا چکیت چماں داریت چے گندیت
مہر ءُ وفاءِ کاشیں کڈک روچءِ سرا
اوستءِ جمبر ترونگل گواریت چے گندیت
چنچو طلب بندیگ انت سماءِ زندانءَ
درد دلءِ ہلکءَ شیزاریت چے گندیت
عیدؔ کجام بیگواہیں گناہءِ باپشتءَ
تئی کہ منءَ دنیا ڈوباریت چے گندیت