جثو جادو بڑتی دلڑو
گوئشتی نی یار روغایاں
دلا زڑتہ غم و مونجھاں
منی اے دیذغاں گڑتہ
رکھاں لڑزانا اے گوئشتہ
کذیں گڑدے منی سنگت؟
گوئشتی ایذا شہ روغایاں
کذیں گڑدغ کئے ئا زانتہ؟
رووخانی مہ گند راہاں
کذی گڑتہ پذا راہے؟
گوئشے اے دوستا گوئشتہ
نی روغایاں نہ گڑداں من
اے ٹونکے اشکنغ رندا
دلا را وزتاں زڑتہ
منی اے زندگانی ئا
تہاری آں جثو گپتہ
مناں دیثو ہمے حالاں
گوئشتی مونجھا موی سنگت!
اگر اے زندگانی ئا
بثہ گڑدغ تہ گڑداں من
مگر مئیں دوست مہلیجیں!
موی چھاری منی دگاں
اے ٹونکانی پذو رندا
غمے یک کھوکھرے رستہ
چھیاریں دیذغاں گڑتہ
جثو گامے بثہ رائی
جثئی ٹکے جدائی ئے
کمیں دیما شثو سنگت
پذا گندی منی ڈیہا
گوئشے چھو کونج گل گنداں
جدائی ئے ہماں ہنداں
کمیں جکاں آں گیراراں
وثی بیلاں وثی یاراں
کُشاں دڑداں دلانی آں
کمیں جکاں کمیں ننداں
ہماں بوذن ہماں ہنداں
وثی یاداں را گیواراں
نی گنداں من جوانی ئا
گریہا لال گیوارا
سرو پاذاں غماں پریں
تواراں گریئغے پاراں
خماریں دیذ ہڑدوئیں
بہغاں چھمغ و ناراں
نی لال ئے حالتا دیثو
غماں شہ اغدہ من ناراں
منی حالت چھو مرگے ئا
آ قیدا نندی کوکاری
کہ ناری زارہاں داری
وثی دوست ئے رہا چھاری
دلا گوں جھیڑغا رندا
نی گنداں لال روغا ایں
گوئشے چھو ماہ روغا پذ
تہاری بڑز بیئغا ایں
کہ ماہ ئے ٹبّغا رندا
جہاں سِیغا کنغا ایں
سیاہیں جرو پوشاکاں
جہانی ئا کثو جاناں
نی گنداں لال روغا ایں
گوئشے چھو ماہ روغا ایں
نی اغدہ حال مئیں دیثو
منی دل گوں مناں جھیڑی
چھو شف محتاج مہتابٓ ئے
ہمے رنگ ماہ محتاجیں
نی گنداں لال گاریں مئے
روّغ ئے سجلیں رنداں
گوئشے چھو صدی یے گوئستہ
مئیخ و تھئی جدائی ئا
من دائیں ہِیل ونداں کہ
تھئہ گڑدے بیروے کارے!