آدم ءِ سینگ تئی اولی گس اِنت
آدم ءِ زہگ ئے ءُ حاتونیں جن ئے
آدم ءِ لاڑیں جنک
آدم ءِ دوستیں گُہار
آدم ءِ سینگ تئی اولی گس اِنت
بے ترا آدم چہ بندات ءَ
کہ بوتگ ناتوام
گوں ترا آدم گِری ہمراہ ءُ برٛاہ
گام پہ گام ءُ راہ پہ راہ
ہؤ بَلے، او آدم ءِ لاڑیں جنک
پہ گِداری لذّتے
نندئے چار راہی سرے
بچکند ءِ سوداءَ جنئے
یا جند ءِ سوداءَ جنئے
آدم ءِ لاڑیں جنک
پہ گِداری لذّتی ءُ پہ گبرّے تاں کدی
گوں نابَکاریں دست ءُ پاد،
چمّ ءُ نظر
شِنگ بیتیں جیگ دوچانی تئی
تاں کدی پہ مُجّتی مِہر ءِ زہیر ءَ
دل بہ بیت سجّیگ حسدیگانی آس ءُ اَنگراں
تاں کدی ساہیل کنتیں
شَرّ ءُ شِرّ، نیک ءُ بداں
زَر نبِشتیں شار ءُ بیکانی نگوٛرتیں نود تئی
تانکدی شنگیت بُگش،
دُنانی لسہیں گیوار ءُ سردیں آہ
تا کدین ءَ پہ ودار ءِ سکّیاں
دیدگانی کندہ ءَ اَرسانی چول گوٛازی کننت
تئی اَنارکاں سُہری یے سَہرا بہ کنت
چومہ بیت تئی گوٛانزگی اَرواہ ءُ ساہ
زِندمان ءِ منزل ءِ راہ ءَ پدا
واتر بہ بنت
کَنڈ ءُ کوردپ، شیپ ءُ حاکوٹاں بہ بیت
چَنک ءُ لاکوٹاں بہ بیت،
آدم ءِ لاڑیں جنک
آدم ءِ دوستیں گُہار
آدم ءِ ہابیل ءُ قابیلانی مات
تو مروچی
مُجّتی مہر ءِ شُہاز ءَ در بہ کپ
روچ ءُ شپ
آدم ءِ لاڑیں جنک