تئی گمانی تاجگیں نِشانیاں گوں چیر ءُ سَر
نزاناں من
کجام ٹپ ھون شانگ اِنت پہ تو
کجام دَرد ءَ سَر جَتہ
کجام یات چو شُدیکیں گُلّڑ ءَ کَلونزگ اِنت
کئیا چَگل جَتہ منا
کہ پُل چکار ءُ تام چُونسیں ترانگانی تئی مگسکاں آزمان وتی کُتہ
اے ژمب ژمب ءِ نعرہانی پسو ءَ نی کئے بدات؟
کئے اِنت کہ پہ من گپ بکنت
کئیا کُتہ
ترا ابید ھم ھزار جیڑھاں بَلے بُگش
گُشیت کئے؟
کہ پرچا سرشپاں
مُلوریں میتگاں
درامدیں سپاھیانی ٹولی کئیت گَشت جَنت
کہ پرچا نوک سوریں زال ءِ تپتگیں بَدن ودار ءِ شَرتگانی زالمیں زَد ءَ نی برپ بَندگ اِنت
کہ پرچا پیر ءُ آجزیں اے چم میم چَنڈگ ءَ نہ اَنت
کہ پرچا لاڑیں مہلب ئے دَگ ءُ پولیس ءُ مُوٹلانی میان ءَ زندگی بکنت
چیا اے آزمان ءِ برہنگیں بدن
زمین ءِ بو
چہ پُلاں مینتگیں سُباھ ءِ کَبگ مَلگیں اے کوش
ابیتک ءُ مومنیں چِریتی تاھتانی برمش
شپاں کُچکی چانگگانی تُرسناکیں شور ءُ شار
ءُ وش لِسانیں کُکڑی توار
مئے گار بیتگیں سیاد ءُ وارثانی کسمت ءَ نہ اَنت
کئے اِنت کہ جُست کنت؟
گُشیت کئے؟
منا وَ اچ ترا ابید
تھنا شیر شاھ ءِ شیرکنیں تلب گمیگ کنت
من مومن ءُ موالیانی میان ءَ سَرگران پٹھان ءِ ہوٹل ءَ رواں
دو پیالہ چاھ تِنگگ ءَ چہ رَند
دو ٹال گولڈ لیف روک بیت
من واناں شعر
پدا پہ نام ونتگیں کتابی لھتے گپ یات کئیت
ءُ لھتے اچ وتا چہ بے سما
لگور ءُ بزگیں
جِنک جَتیں
ءُ کیسگ ءَ چہ پارگیں
پہ نام زانتکاریں سنگتانی میان ءَ گپ ءُ رَپ بیت
کَس ئے پہ آجوئی شھید بیتگیں مئے امبرے سنگتانی سار ءُ ہوش بئیگے سرا گُشیت
کَس ئے پہ نام ڈن ءَ نِشتگیں مئے زانتکاریں لیڈرانی مات ءُ زالاں زاھ دات
کَس ئے منیر ءِ شعراں نِگدی چماں چارگ اِنت
کَس ئے گوں داد ءِ گُشتگیں تلاھ ءُ بے بلاھیں گپاں چیر ءُ سر
کَس ئے گُشیت کہ اشکے پلسپہ چَٹ ءَ رَد اِنت
کَس ئے گُشیت کہ زندگی وَ مرچاں سھتُکے ھوں وش نہ اِنت
کَس ئے پہ زالبول ءِ آجوئی ءِ ھاترا دلیل دات
کَس ئے پہ دُود گُشتناں گُشیت
کَس ئے گُشیت کہ سیاست ءَ گوں دین ءُ مہذب ءَ چے کار
کَس ئے چہ مارا درستاں سرجم ءَ جُتا وتی وڑ اِنت
اناگاھ کَس ئے جُست کنت
کجام کوٹی ھالی اِنت
کِلیت کُج اَنت
منا زبان داتہ لھتے روچ پیش دیستگیں جِنکی ءَ
اے جیڑھانی میان ءَ من چَٹ ءَ وتی وڑا
اے چم دیر ایریں نیم پُریں پیالہ ءِ مُلوریں لُنٹاں سَک داتگنت
شَکر چَکار ءُ چَرپناکیں زرد رَنگیں لُنٹ
مَگِسکاں چنچوک دوست بَنت
پَدا من کِرچک بَستگیں تئی لُنٹ ءِ ترانگ ءَ کپاں
تُشے ملور باں
ھمے دمان ءَ سَنگتے
اناگاھ ھال دَنت مناں
تئی لَنکوکانی میان ءَ رُوکیں گولڈ لیف ءَ سھتے بیت کہ وتکشی کُتہ