کَیپ ءُ کدّہ گوں ہما پُلگدیں شاری باتاں
زندبے مرک بباتیں، ہما باری باتاں
وش نصیب انت کہ گیپت پک گلابیں رکاں
شالا مادی چو سمین ءَ تئی چاری باتاں
دیر مانیت تاکد ءَ شیشگی بھنگانی ملار
ماتئی قدحیں چمانی خماری باتاں
شپ چہ تئی مہپراں شنگ بات کدی روچ مبات
زانسر ءَ ماتئی داں مرک، وداری باتاں
او منی ماہ! چو جوہان ترا امبازاں
شنگ ماہکانیں سری ءَ کہ شہاری باتاں
رولہی بیت کہ سْرپنت انت تئی گلرنگیں انارک
کجلیت شپ کہ تئی بیک شفاری باتاں
پہ تئی حاترا اے سوچنیں پیگور چے انت
ما میاری آں، میاری آں، میاری باتاں
شات تاکد کج ءِ گندوک پہ بے وانکی بیت
پاشک باتاں اگں ہلک ءِ نہ گماری باتاں