شیرگ ءَ شیر کتہ، بینگ ءَ نوکاپ کتہ
ترْانگ ءِ تْرمپے ءَ عمر آسری زپتاپ کتہ
من پہ ہوشام ءِ غماں، یخ زدگ ءُ روچ زبہر
چو گُشانے کہ گُل ءَ مچکدگ ءَ تاپ کتہ
چُش پہ یک رنگے انارکانی کلونٹاں بہ چشاں
ماوتی واہگ ءِ نیمون پہ تُن آپ کتہ
دْراہی ءِ آچش ءَ گون انت منی مہر ءِ آمین
دل منی لاڑی ئیں ایرہت ءِ غماں آپ کتہ
پاشک تئی گندگ ءِ احوال چورنگ ءِ گْواہی
عشق ءِ سرگْوات ءَ دْرہیں مچکدگ ءَ چاپ کتہ
نازبُو ملّگیں پِیشّانی بزیں ساہگ ءَ بیا
من ءَ کریاب تئی دُوری ءَ روتاپ کُتہ
بیا او کُوش لذّتیں، ماہکان چکیں گرکی تل
تئی وش نیاوی ءِ زر نوداں پدا ترْاپ کتہ
فاضل ءِ شیرکنیں شعرانت تئی بالاد ءُ بدن
شاتؔ ءِ شررنگیں حیالاں ترا گوناپ کتہ