کوچگءَ دلگانیں دردءِ پہ بہارءَ نشتگاں
ایوکءُ تہنا غماں گوں تئی ودارءَ نشتگاں
کیت بلکیں سہتکے اے نیمگا پہ سئیلے ءَ
پہ مُرادے گوں ودارءِ گرانیں بارءَ نشتگاں
باریں چون اَنت مرچاں ڈیہہ ءِ بیگہ ءُ صُحبانی رنگ
دیر من چہ حانل ءِ پُلّیں دیار ءَ نشتگاں
تئی دوری ءَ تیرے جتگ انچو کہ دل بے گوْانک کتگ
دور ٹوہین اِیت منءَ من بے توارءَ نشتگاں
دل گنوک اِنت ترانگاں گیجیت شکر ورنائیءِ
ہلک ءِ مہرنگءُ گلیں کاڈاں ہوارءَ نشتگاں
بیا برو قاصد ببر حالاں بدئے مہگونگءَ
وارکنءُ بیا زیت بے تو بے قرارءَ نشتگاں
حق شُناسی عیؔد گوں دوستاں چون بیتیں تو بگُش
بے وسءُ بے دزرساں، بے دردوارءَ نشتگاں