کجا! شَررنگی ءُ مَھدُروشمی اَت
بھِشت ایں زندمان ءَ جَھندمی اَت
اَوَل پاساں آ گرماگی شپانی
گشے وش بوئیں پُلّے آسمی اَت
بِہ رَپتیں آ ھَمُک جاہ ءُ دَیارے
کپگ دوستاں دُچارئی، اَلّمی اَت
من دیواناں گُلیں آ، ہمسرانی
مُلور اَت بے کساس ءَ سک غمی اَت
گِران اَت زَردی یے رُو ءَ طلاھیں
سَبب وَ بُندریں حون ءِ کمی اَت
نہ شُت دَرمان ءُ دارُو، ٹِکّ ءُ ٹاک ءَ
کہ رنج اَت دوستانی، دائمی اَت
چتور باوَرکُتیں ساحرؔ جَھان ءَ
اِے قول آئیءِ باریں چُنتمی اَت